Breve Istória ESTV No. 2 de Lospalos
Ensino Secundário Técnico Vocacional No. 2 de Lospalos (ESTV) hari’i iha fatin Laiku, Aldeia Bemoris, Suco Fuiloro, Posto Administrativo Lospalos, Município Lautém, iha loron 16 fulan Janeiro tinan 2017. Eskola ida ne’e loke ho Departamentu rua (2) (Comércio no Contabilidade). Maibe tamba ho nesesidade estudante sira iha ensinu baziku ne’ebe interese hodi asesu ba departamentu informatika, ho akordu liu husi enkontru manorin sira, deside hodi loke departamentu Gestaun Ekipamentus no Informatika iha tinan 2020.
Edifísiu Ensino Secundário Técnico Vocacional No. 2 de Lospalos, iha tinan 2017 provizoriamente uja edifísiu Ensino Básico Central Laico. Edifísiu ida ho salas de aula 4 (ha’at), sala tolu uja ba aula departamentu Comércio (aula rua) no departamento Contabilidade (aula ha’at), (fahe ba tornu dader no lokraik) no ida ba eskritóriu manorin sira. Ho aumenta kanorin kada tinan sei muda orariu ba parte tarde deit hodi labele impede horariu manorin nian.
Iha inisiu 2017, fasilidade ne’ebe eskola iha mak; meja no kadeira hamutuk 140 pares, livru materia geral ajuda husi ESG Nino Conis Santana Lospalos. Livru materia espesialidade ba Departamentu Comercio no Departamento Contabilidade husi Ministériu Edukasaun, Juventude no Desportu (Diresaun Nasional Ensino Secundário Técnico Vocacional). No komputador 2 (rua).
Iha tinan tuir mai ho suportasaun inan-aman, konsege aumenta material balu nebe eskola presija hanesan meja, kadeira, komputadores, laptop, no sasan seluk ne’ebe eskola presija hodi suporta ba atividade hanorin nian.
Kondisaun manorin no kanorin iha eskola ida ne’e mak: manorin funsionariu públiku hamutuk na’in 9 (sia), manorin kontratadu Ministeriu Edukasaun hamutuk na’in 6 (neen). Manorin kontratadu eskola hamutuk na’in 6 (neen), manorin temporariu hamutuk na’in 2 (rua), guarda eskola na’in 1 (ida), no ajente administrasaun na’in 1 (ida). Kanorin hamutuk nain 263 iha fulan Janeiru tinan 2020. Kanorin klase 10 nain 94, klase 11 hamutuk nain 62 no klase 12 hamutuk nain 106. Total kanorin hamutuk nain 263.
